Saturday, April 5, 2014

ANG KAPE'NG PABASKOG NI DONG LAPOY


ANG KAPE'NG PABASKOG NI DONG LAPOY

"Day, nagduka na man ko." ni Dong Lapoy pa.

"Syaro ka man sab, wala ka gyud makamatikod? Bag-o pa man ning haon, nasyampohan na, nakapangibot na kos ibtonon, ug nakapangandam na kos andamonon.' tubag ni Day Darling nga nagpahiyom paatubang sa kapikas nga si Dong Lapoy.

Tuktok tuktok..

"Maayong gabii." tingog ni Buddy pangag, drayber ug habalhabal ang ilang nabati.

"Unsa man unta Buddy? Nagduka na man gud si Dong Lapoy." naaburido si Day Darling.

"Gipahatod man gud ning usa ka dosenang kape ug ipahatag ni Lapoy." dakong tingog ang pagtubag ni Buddy.

"Ah mao ba. Hala ambi na bi. Kini gyud si Dong Lapoy gisorpresa ko. Ako ning ipainom niya. Sus. "ginseng concentrate" ra ba ang nasulat. Grabeha kaha ani no. Ah yuna pa. Magkuha kog bayad ha."

"Ayaw na bayri. Ingon man si Sita nga ihatag na niya ni Dong Lapoy." nagngising namulong si Buddy.

"Kinsa nga Sita gud? Katong tindera'g tableya sa Pasil maadlaw?" Katong mangtas sa kabaret sa A. Lopez magabii? Ako man gud tong nabasahan ang teks niya sa akong bana kaniadto. Pero nahunong na man to." namuwa ang panagway ni Day Darling nga namulong.

"Wala na sila magtektek. Sige na sila ug kita oy Day Darling. Nalipay man gud si Sita kay human makapangape si Dong Lapoy, milagsik man kuno. Kusog na kuno kaayo mosikad. Iya bitaw ning gipadala aron dili siya mataptan sa pagkalapoy inig uli. Nahingawa siya basin ug magluya na lang unya si Dong Lapoy inig uli. Basin ug mahibulong nya ka. Sige ha Day Darling, molakaw nako." dayong lakaw ni Budy palayo.

"Darling, dali na kadugay ba nimo mibalik diri. Mangatulog na ta gikapoy ko. Tibuok adlaw kong nangitag kuwarta. Sa pagdrayb ug sikadsikad." luyahong panampit ni Dong Lapoy sa kapikas.

Nagminti sa kasuko si Darling. Mitan-aw siya sa takuri nga nabinlan pag tubig nga pinabukalan. Iya bang kutawan si Dong Lapoy ug kape nga gisambogan ug ginseng? Iya bang painitan si Dong Lapoy ug init tubig aron mahinultol sa saktong dalan?

"Huwata ko diha Lapoy!! Ayaw kog katulgi ha. Diay kape akong ipainom nimo. Kutawan tikag lima ka putos siyaro ug dili ka makadaro. Hala, paghulat diha! Kon sikad imong mahimo ngadto ni Sita sa akoa padarohon tika.! Kon dili, hala dia pa ning takuri nga may init tubig, sentinsyahan tika niini.!" taas ang tingog ni Day Darling...

"Unswaa! Wala pa ko dukaa Day Darling. Ready pako, dili pa ni kagar akong bateri" (katapusan).
Post a Comment

P A G A T A S

PAGATAS pagatas, pagatas,   sa init nga sabaw kini manghaw-as,   sa init nga hinigupay, ang gutom maluwas,   pangandam kini sa...