Kaban ni Atty. J. B. Jimenez: TAKUBAN

Pagkadaghan sa Nagsul-ob ug puti,

Nagpaka aron ingnon nga mga putli,

Kasagaran Kon Mamulong Sa Atubangan,

Sa Maot Ug Tigpa-kaaron Ingnong Katilingban,

Sila Nagpa kita Nga Mga Halangdon,

Nagsul-ob Ug Sapot Nga Hari-amon,

Apan Sa Ilawom Sa Ilang Kasingkasing,

Naglugitom Ang Kahakog Nga Nanalingsing.

Humot Ang Ilang Mga Kalawasan,

Kay gi Agwahan Sa Udlot Sa Kabulakan,

Apan Maidlot Ang Tunok Sa Ilang Dughan,

Puno Sa Pag Paka Aron Ingnon, Pagtakuban,

Kay Tugob Sa Nag Alintabong Kasilag Ug Kayugot,

Nag Pungasi Ang Kasina, Kasuko' Ug Kaligotgot,

Sa Atubangan Pulos Ang Mga Pinulongan Lunsay,

Apan Sa Binuhatan Pagbudhi Lamang Walay Tiunay.

Nag Takuban, Nagtakuban Kay Giliminan Sa Kahadlok,

Sa Aninong Naghambin Sa Kagahapong Nagkalapok,

Gidan-okan Sa Mga Puting Habol Sa Pagmakuli,

Ug Gitabilan Sa Sapot Sa Mga Sala'ng Di Na Ika-uli,

Nag Pakita Ug Kaayo Sa Atubangan Sa Mga Dungganon,

Kay Lagi Sa Ambisyong Sa Mga Hamili Buot Motipon,

Nagpa Ila Nga Maaghop Atubangan Sa Mga Mabangis,

Kay Buot Purongpurongan Sa Gingharian Sa Mga Bagis.

(Bug-os ang pasalamat sa  KAHAYAG  ngadto sa nagsulat sa  garay    nga si  ATTY. JOSEPHUS B. JIMENEZ.   Usa siya ka kanhi Department of Labor and Employment  (DOLE)  Undersecretary, kanhi Vice President, PEPSI COLA PHILIPPINES, kanhi Director for Labor Relations, SAN MIGUEL CORP., kanhi Personnel Director, PETRON ug PNOC, magtutudlo sa kurso sa abogasya sa mga dagkong tunghaan sa Manila sama sa UST, FEU, UE, SAN SEBASTIAN,  kanhi Labor Attache ngadto sa mga nasod sa Malaysia, Kuwait ug Taiwan,  magsusulat sa nagkadaiyang libro sa mga nagtuon sa kurso pagka abogado. Nagikan siya  sa pamilya nga taga Ronda, Dumanjug ug Argao sa lalawigan sa Sugbo. Malamposon kaayo siya sa pagkab-ot sa iyang damgo ug tinguha, ug karon magtampohan sa peryodikong The Freeman isip magsusulat ug artikulo matag semana. Siya ang tigtukod sa grupo sa mga magsusulat nga magtatampo sa grupong LAB-OK  kon  LUNSAY NGA AMBAHAN SA MGA BISAYA SA FACEBOOK)