Kaban ni D_BystandeR: SUGILANON SA MAKASASALA

Didto sa Aloguinsan gitaho nga misayaw si Gwen Garcia nga nagdala sa imahen ni Sto. Nino kauban ang mga magtutudlo sa lungsod sa usa ka gitawag ug "Sinulog dance competition." Ang iyang kinaiya nga nabantug na sa pagkadaugdaugan sa panahon nga buhi pa si Bise Gobernador Greg Sanchez daw sa dili mohaum sa iyang gipakita nga imahen nga aron ingnon siya nga maayong tawo nga puno sa kaaghop ug Diyosnon.

Nakahinumdom ko dunay sugilanon sa usa ka makasasala nga nagluhod sa atubangan sa dakung krus ni Ginoong Hesukristo diin ang Ginoo mituaw, "Kun wa pa ni ilansang ang akong mga tiil sa krus, hagbay ra kang nabulintang sa akong patid diha sa akong tiilan kay di ko makaako ug sud-ong sa imong hitsura nga puno sa pagpaka-aron ingnon nga niila sa akong pagka-gamhanan apan sa way kukalooy imong gipasipad-an ang akong mga ginsakpan nga gi-uhaw sa hustisya."

(Bug-os ang  pasalamat sa KAHAYAG ngadto sa magtatampo  nga si JOHNNY LOVE. Nagtakuban siya sa pangalan, "D_BystandeR".  Natawo siya sa Sugbo apan anaa na karon manimuyo sa Illinois sa tinipong nasod sa Amerika. Ang kusog nga koneksyon sa kasayuran pinaagi sa internet kanunayng naghaling sa iyang kadasig  pagtuki sa mga nagbukalbukal nga hisgutanan dinhi sa atong nataran. Usa siya ka magsusulat nga gradwado sa kursong komersiyo padulong sa pagka accountant sa University of San Carlos kaniadtong tuig 1961.  Nahimo siyang miyembro sa usa ka hugpong sa mga batan-ong magsusulat nga gitawag ug STUDENT PRESS.  Nahimo usab siyang   Associate Editor sa basahon  USC-JPIAN sa tuig 1962-63. Magtatampo usab siya isip magsusulat sa nasudnong magasin,  "Philippines Free Press" ug sa mga nag-unang peryodiko dinhi sa dakbayan sa Sugbo sa lunhaw pa ang iyang pangedaron. Nahimo siyang mamumuo sa usa ka pribadong kompaniya sa dakbayan sa Sugbo, ESCAÑO LINES, sulod sa napulo ug duha (12) ka tuig  dayon niyang tapon  ngadto sa NAPOCOR  ug nahimong kawani sa kagamhanan  sulod sa bayente dos (22) ka tuig. Niadtong tunga-tungang bahin sa tuig 2000, nilalin siya ngadto sa tinipong nasod sa Amerika ug sulod sa napulo (10) ka tuig, nagtrabaho siya sa  buhatan sa kagamhanan sa nasod sama  sa  UNITED STATES POSTAL SERVICE (USPS).  Karon sa pangedaron nga 67,  gihuptan gihapon niya ang walay pagkutat nga kadasig ug walay busganan nga kaikag sa pagpaambit sa iyang nahuptang abilidad  ug kabatid sa panulat.  Dili niya mapugngan ang kaugalingon sa pagpaambit sa iyang mga hunahuna labi na kon molambigit kini ug hisgotanan nga makadani sa iyang mga mata.)