Kaban ni D_BystandeR: ANG KALAINAN NI TOMMY UG MIKE

Akong nakita nga nag-away na ang mga lumalaban ni Tommy ug Mike apan bisag unsaon ug pangugat sa mga dumadapig ni Mike wa na gyud silay mahimo kay kining Cebu sukad pa sa panahon ni Serging nga maoy giila nga "Nino Bonito" sa Sugbo wa pa mahitabo nga nailog sa laing bansagon. 

Kini tungod sa kaligdong, katarong, ug kamanggihunahunaon sa mga Osmena nga kamao motan-aw sa atong mga kaigsuonan nga nagkalisudlisud ang ilang pagkabutang dili sama sa gibuhat ni Mike nga ang mga kabus way luna sa iyang kasingkasing kay gikan man siya sa mga pamilya nga adunahan. Sukad pa sa panahon ni Don Sergio Osmena, ang  giila nga, "Grand Old Man of Cebu," wa to siya igdungog nga nag-abuso sa iyang gahum taliwala sa iyang pagkagamhanan niadtong panahona diin nahimo siyang unang Speaker sa House of Representatives.

 Unya nahimo pa gyung Presidente sa nasud human motaliwan si Manuel L. Quezon. Ang tanang mga tawo kaniadto nagpaluyo sa liderato sa mga Osmena ug ang mga Osmena maoy nagpaila nila sa katawhang Sugboanon sa mga kalihokan nga sama niining bugnong lugaynon diin magpili ang katawhan sa ilang mga haligi sa lungsod.  Ug dinhi sila maila nga mga politikanhon lider sa mga Osmena. Apan dunay ginaingon nga ang tawo bisan sa imong gipakitang kaayo, imo nang gihatagan sa imong kamot sa pagtabang aron sila mo-uswag apan dili matagbaw ang ilang gusto hasta ang siko sa tag-iya sa kamot nga nitabang nila ilang apilon ug lamoy. Mao nay nahitabo 'ron sa mga tawo nga kaniadto nila  sa liderato sa mga Osmena apan tungod kay way katagbawan buot nila nga sila nay maghari. Apan ang maboot nga mga Sugboanon dili mailad. Karong eleksyon anhi nimo makita unsa kainit ang paglaban sa mga Sugboanon sa mga Osmena nga pinangulohan ni Tommy O ug uban sa iyang mga kauban sa tibuok partido sa BOPK. 

Ang entero tiket sa partido ni Tommy gitagna nga mangharos ug hayag pa sa udtong tutok ang ilang kadaugan sa umaabut nga eleksyon ug ang maong kadaugan, kadaugan usab sa mga maboot nga mga Sugboanon.

(Bug-os ang  pasalamat sa KAHAYAG ngadto sa magtatampo  nga si JOHNNY LOVE. Nagtakuban siya sa pangalan, "D_BystandeR".  Natawo siya sa Sugbo apan anaa na karon manimuyo sa Illinois sa tinipong nasod sa Amerika. Ang kusog nga koneksyon sa kasayuran pinaagi sa internet kanunayng naghaling sa iyang kadasig  pagtuki sa mga nagbukalbukal nga hisgutanan dinhi sa atong nataran. Usa siya ka magsusulat nga gradwado sa kursong komersiyo padulong sa pagka accountant sa University of San Carlos kaniadtong tuig 1961.  Nahimo siyang miyembro sa usa ka hugpong sa mga batan-ong magsusulat nga gitawag ug STUDENT PRESS.  Nahimo usab siyang   Associate Editor sa basahon  USC-JPIAN sa tuig 1962-63. Magtatampo usab siya isip magsusulat sa nasudnong magasin,  "Philippines Free Press" ug sa mga nag-unang peryodiko dinhi sa dakbayan sa Sugbo sa lunhaw pa ang iyang pangedaron. Nahimo siyang mamumuo sa usa ka pribadong kompaniya sa dakbayan sa Sugbo, ESCAÑO LINES, sulod sa napulo ug duha (12) ka tuig  dayon niyang tapon  ngadto sa NAPOCOR  ug nahimong kawani sa kagamhanan  sulod sa bayente dos (22) ka tuig. Niadtong tunga-tungang bahin sa tuig 2000, nilalin siya ngadto sa tinipong nasod sa Amerika ug sulod sa napulo (10) ka tuig, nagtrabaho siya sa  buhatan sa kagamhanan sa nasod sama  sa  UNITED STATES POSTAL SERVICE (USPS).  Karon sa pangedaron nga 68,  gihuptan gihapon niya ang walay pagkutat nga kadasig ug walay busganan nga kaikag sa pagpaambit sa iyang nahuptang abilidad  ug kabatid sa panulat.  Dili niya mapugngan ang kaugalingon sa pagpaambit sa iyang mga hunahuna labi na kon molambigit kini ug hisgotanan nga makadani sa iyang mga mata.)