Kaban ni D_BystandeR: PALUGPITAN SA KABAN ANG HINAGIBAN???

Dinhi makita nimo ang pagka-"mananap" niining tawhana nga wa na gani motahod sa asawa sa iyang uyoan nga nag-edad na ug 40 anyos kay iyang gipalabi ang iyang tawhanong kahinam diin sa usa ka linuog nga paagi iyang gipusgay ang kadungganan niini pinaagi sa hulga ginamit ang usa ka armas de fuego sa wa masuta nga kalibre. Nahitabo kini ngadto sa usa ka inahan nga aduna nay duha ka buok anak kaniadto pang Agosto 3 sa miaging tuig sa lungsod sa Badian ug karon ang kaso anaa na sa Cebu City Court. 

Ang maayong isilot niining tawhana kon gitugot pa lang unta sa balaod mao ang pagpalugpit sa kaban sa iyang "hinagiban" aron di na siya mo-usab pa ug aron himoong leksyon niadtong ubang tawo nga nawad-an na sa kabuot ug nahimo nang dakung hulga sa atong mga kababayen-an.

(Bug-os ang  pasalamat sa KAHAYAG ngadto sa magtatampo  nga si JOHNNY LOVE. Nagtakuban siya sa pangalan, "D_BystandeR".  Natawo siya sa Sugbo apan anaa na karon manimuyo sa Illinois sa tinipong nasod sa Amerika. Ang kusog nga koneksyon sa kasayuran pinaagi sa internet kanunayng naghaling sa iyang kadasig  pagtuki sa mga nagbukalbukal nga hisgutanan dinhi sa atong nataran. Usa siya ka magsusulat nga gradwado sa kursong komersiyo padulong sa pagka accountant sa University of San Carlos kaniadtong tuig 1961.  Nahimo siyang miyembro sa usa ka hugpong sa mga batan-ong magsusulat nga gitawag ug STUDENT PRESS.  Nahimo usab siyang   Associate Editor sa basahon  USC-JPIAN sa tuig 1962-63. Magtatampo usab siya isip magsusulat sa nasudnong magasin,  "Philippines Free Press" ug sa mga nag-unang peryodiko dinhi sa dakbayan sa Sugbo sa lunhaw pa ang iyang pangedaron. Nahimo siyang mamumuo sa usa ka pribadong kompaniya sa dakbayan sa Sugbo, ESCAÑO LINES, sulod sa napulo ug duha (12) ka tuig  dayon niyang tapon  ngadto sa NAPOCOR  ug nahimong kawani sa kagamhanan  sulod sa bayente dos (22) ka tuig. Niadtong tunga-tungang bahin sa tuig 2000, nilalin siya ngadto sa tinipong nasod sa Amerika ug sulod sa napulo (10) ka tuig, nagtrabaho siya sa  buhatan sa kagamhanan sa nasod sama  sa  UNITED STATES POSTAL SERVICE (USPS).  Karon sa pangedaron nga 68,  gihuptan gihapon niya ang walay pagkutat nga kadasig ug walay busganan nga kaikag sa pagpaambit sa iyang nahuptang abilidad  ug kabatid sa panulat.  Dili niya mapugngan ang kaugalingon sa pagpaambit sa iyang mga hunahuna labi na kon molambigit kini ug hisgotanan nga makadani sa iyang mga mata.)