Kaban ni Atty. J. B. Jimenez: ASA PAINGON ANG MGA BALOD SA KAPALARAN . . . .?

Asa kaha mo paingon,

Ang huros sa hangin ug panahon,

Unsay padulngan sa mga panghitabo',

Sa Kalipay Ba, Kamingaw o Sa Mga Kasubo'?

Kinsay Nasayod Kuon Sa Timog Ba O Silangan,

O Dili Ba Hinuon Sa Kasadpan Ug Sa Habagatan?

Unsa Kahay Dangatan Sa Kaugmaon,

Magpabilin Ba Sa Daan O Magbalhinon

Kinsay Makatagna' Sa kahibulongang Ugma'

Dili Nato Mapiho Kon Mohaum Ba O Motukma',

Kay Lagi Puno' Kini Sa Mga Tulokibon Nga Tigmo'

Dili Nato Maseguro Kon Unsay Mamugna' O Mahimo?

Sa Dakong Lawod Nga Gitawag Ug Kinabuhi',

Daghang Mga Gumonhap Nga Lain Lain Ug Lahi,

Sa Dakong Kawanangan Ning Malinlangon Nga Kalibotan,

Nag Balod Balod Ang Mga Hadla' Ug Hunat Sa Kiat Nga Kapalaran,

Matag Usa KaTawo, Gapnod Lamang Nga Kanunay Nga Ibanlas,

Sa Lapyahan Sa Panahon Nga Magatagik Sa Sugilanon Ug Maga Papas.

Maga Papas Sa Mga Kaagi SaAtong Kagahapon,

Apan Samtang Maga Papas Usab Sa Maong Baybayon,

Maga Tagik Ug Mga Bag-ong Tipaka Sa Tawhanong Pakigbisog,

Diin Matakos Sa Mga Pagsulay Ang Atong Mga Panganti Ug Kaisog,

Kon Asa Mang Pulo' Ipadpad Ang Mga Pangandoy Nga Gitagik Nato Sa Balas,

Ang Tawhanong Paglaum Mosukol Ug Manlimbasog Bisag Asa Pa Ibanlas.

(Bug-os ang pasalamat sa  KAHAYAG  ngadto sa nagsulat sa  garay    nga si  ATTY. JOSEPHUS B. JIMENEZ.   Usa siya ka kanhi Department of Labor and Employment  (DOLE)  Undersecretary, kanhi Vice President, PEPSI COLA PHILIPPINES, kanhi Director for Labor Relations, SAN MIGUEL CORP., kanhi Personnel Director, PETRON ug PNOC, magtutudlo sa kurso sa abogasya sa mga dagkong tunghaan sa Manila sama sa UST, FEU, UE, SAN SEBASTIAN,  kanhi Labor Attache ngadto sa mga nasod sa Malaysia, Kuwait ug Taiwan,  magsusulat sa nagkadaiyang libro sa mga nagtuon sa kurso pagka abogado. Nagikan siya  sa pamilya nga taga Ronda, Dumanjug ug Argao sa lalawigan sa Sugbo. Malamposon kaayo siya sa pagkab-ot sa iyang damgo ug tinguha, ug karon magtampohan sa peryodikong The Freeman isip magsusulat ug artikulo matag semana. Siya ang tigtukod sa grupo sa mga magsusulat nga magtatampo sa grupong LAB-OK  kon  LUNSAY NGA AMBAHAN SA MGA BISAYA SA FACEBOOK)