Kaban ni D_BystandeR: NASIPYAT ANG KAIGMAT???

Mao nay giingon nga ang mga abogado ni Madam Gwen nalab-anan sa ka-"bright" tiaw mo nga ang suspension order nga pinirmahan sa atong Presidente Noynoy giyano-yano lang ug dispatsar nga kuno usa ka order nga "invalido."

 Ug unya ilang gipangangkon sa ilang "manifestation" nga ang ilang gipangayo nga TRO aron kuno malikayan ang "bloodshed and violence." Buot ba nilang ipatoo nga "mohari ang kagubot ug mobaha ang dugo" kon dili sila hatagan sa TRO? Ang tanang buhat inabogado ila nang nahurot ug gamit ug ang katawhan gipul-an na sa ilang mga salida nga pulos way lami. Maayo pa'g mogawas na lang ka diha sa imong giluklukan sa Kapitolyo Madam Gwen aron makapahuway sa kahasol ang mga tawo nga anaa diha nagtrabaho ug lakip na niadtong dunay mga opisyal nga tuyo sa mga buhatan diha sa sulod. Malooy intawon ka sa mga Sugboanon nga gikapoy na sa imong mga nagkadaiyang mga tayada nga gipakita. Maayo pa nimo nga mogawas ka na lang diha kay basin pa ug may purohan ka pang makadaginot ug pipila ka buok botos aron makapangampanya ka sa gawas, ngadto sa mga kalungsoran kay nagkakusog na ra ba sa pagkakaron ang imong kaatbang sa 3rd District nga si Madam Geraldine nga anak ni Dr. Yapha tungod sa kasuko sa mga tawo nga wa ka morespeto sa "suspension order" sa Presidente.

 Kay basin ug moingon unya ka nga nga napildi ka kay wa kang kalugar ug pangampanya kay nababoy ka diha sa Kapitolyo.

(Bug-os ang  pasalamat sa KAHAYAG ngadto sa magtatampo  nga si JOHNNY LOVE. Nagtakuban siya sa pangalan, "D_BystandeR".  Natawo siya sa Sugbo apan anaa na karon manimuyo sa Illinois sa tinipong nasod sa Amerika. Ang kusog nga koneksyon sa kasayuran pinaagi sa internet kanunayng naghaling sa iyang kadasig  pagtuki sa mga nagbukalbukal nga hisgutanan dinhi sa atong nataran. Usa siya ka magsusulat nga gradwado sa kursong komersiyo padulong sa pagka accountant sa University of San Carlos kaniadtong tuig 1961.  Nahimo siyang miyembro sa usa ka hugpong sa mga batan-ong magsusulat nga gitawag ug STUDENT PRESS.  Nahimo usab siyang   Associate Editor sa basahon  USC-JPIAN sa tuig 1962-63. Magtatampo usab siya isip magsusulat sa nasudnong magasin,  "Philippines Free Press" ug sa mga nag-unang peryodiko dinhi sa dakbayan sa Sugbo sa lunhaw pa ang iyang pangedaron. Nahimo siyang mamumuo sa usa ka pribadong kompaniya sa dakbayan sa Sugbo, ESCANO LINES, sulod sa napulo ug duha (12) ka tuig  dayon niyang tapon  ngadto sa NAPOCOR  ug nahimong kawani sa kagamhanan  sulod sa bayente dos (22) ka tuig. Niadtong tunga-tungang bahin sa tuig 2000, nilalin siya ngadto sa tinipong nasod sa Amerika ug sulod sa napulo (10) ka tuig, nagtrabaho siya sa  buhatan sa kagamhanan sa nasod sama  sa  UNITED STATES POSTAL SERVICE (USPS).  Karon sa pangedaron nga 67,  gihuptan gihapon niya ang walay pagkutat nga kadasig ug walay busganan nga kaikag sa pagpaambit sa iyang nahuptang abilidad  ug kabatid sa panulat.  Dili niya mapugngan ang kaugalingon sa pagpaambit sa iyang mga hunahuna labi na kon molambigit kini ug hisgotanan nga makadani sa iyang mga mata.)