PIYONG

nagpasabot ug mata’ng tinak-opan,

lunlon kangitngit ang masaksihan,

may motilaw’ng   gilamian,  mopiyong,

katam-is ug kalalim bation,   tagamtamon  

may kanunay’ng magpiyong, magpurong

alisto, maalagaron mga sakit wagtangon

bisa’g magpiyong, ikaw hiramon ug susihon

siya albularyo,  ang tanan buhaton, sakit ayuhon.

ang piyong sa kagabhion

talan-awong mubukot  matag tikyop sa kagabhion

human sa  panihapon, sundan kini sa buhat lawasnon

tugkaron ang  hangop sa mabugnawong  panahon

imong pangandaman, pagkatulog pinaagi sa pagpiyong

ang piyong sa kaadlawon

nagpasabot sa makaluya ug makutas nga kagabhion,

sa subra’ng lumpayat, mataligam-an mo ang  panahon

madala ka sa bul-og,  makalimot, musaylo sa gidugayon

apan diay, kini pahiuli ug hulip sa nakalimtang buluhaton

  

ang piyong sa kabuntagon

kini maoy pagpiyongpiyong,  maniid sa kahilom

gamitong palusot sa mga pangutanang maukiton,

gikan sa binuhat nga naghulat, nagkagot ang ngipon

tungod  kay ikaw nabuntagan’g  nagpiyongpiyong

ang piyong sa kaudtohon

 talan-awon   kini sa mga tinagoang  tulumanon,

kinawatkawat nga  himaya sa hamubong panahon,

matag gutling,  gutlo, dili usikan kay  bulawanon,

ikaw   makapiyong,  timaan sa mainit nga kaudtohon.