Kaban ni Atty. J. B. Jimenez: KANAUG NA BABY

Kanaug na Ayaw Paghulat,

Nga Matuman Ang Mga Nahisulat,

Ayaw Paabota Nga Puniton Ka Ug Ibalibag,

Ayaw Hulata Nga Ang Mga Sukna' Dili Mo Na Matubag,

Kanaug Na, Ayaw Pag Batoki Ang Mga Mabangis Nga Hampak,

Kay Matuman Ang Pagbuot Sa Langit, Way Balor Ang Imong Pagsupak.

Kanaug Na Sa Imong Tronong Gilingkoran,

Pasagdi Nga Ipatuman Ang Sugo Sa Katarungan,,

Hulata Nga Ang Haring Lungsod Ang Maga Hukom,

Kon Aduna Ba Ang Imong Palad Iaing Luna Sa Paglaum

Kanaug Na Ug Ipatigbabaw Ang Imong Halangdong Dignidad,

Kay Modaug Ang Kamatuoran, Ug Walay ni Gahum Ang Abilidad.

Kanaug Na Samtang May Nahabilin Pang Pailob,

Sa Imong Pakig Sumpaki Nga Gisubli subli Pag Usob,

Nasayod Ang Lungsod Kon Kinsa Ang Tinuod Nga Lunsay,

Ikaw Bang Gipalagpot Ug Ang Gipuli Sa Balaod Sa Kahusay,

Samtang May Nahabilin Pang Pag Respeto Ang Mitahod Kanimo,

Kanaug Na Intawon Kay Kining Asunto Dili Na Madala Ug Remo Remo.

(Bug-os ang pasalamat sa  KAHAYAG  ngadto sa nagsulat sa  garay    nga si  ATTY. JOSEPHUS B. JIMENEZ.   Usa siya ka kanhi Department of Labor and Employment  (DOLE)  Undersecretary, kanhi Vice President, PEPSI COLA PHILIPPINES, kanhi Director for Labor Relations, SAN MIGUEL CORP., kanhi Personnel Director, PETRON ug PNOC, magtutudlo sa kurso sa abogasya sa mga dagkong tunghaan sa Manila sama sa UST, FEU, UE, SAN SEBASTIAN,  kanhi Labor Attache ngadto sa mga nasod sa Malaysia, Kuwait ug Taiwan,  magsusulat sa nagkadaiyang libro sa mga nagtuon sa kurso pagka abogado. Nagikan siya  sa pamilya nga taga Ronda, Dumanjug ug Argao sa lalawigan sa Sugbo. Malamposon kaayo siya sa pagkab-ot sa iyang damgo ug tinguha, ug karon magtampohan sa peryodikong The Freeman isip magsusulat ug artikulo matag semana. Siya ang tigtukod sa grupo sa mga magsusulat nga magtatampo sa grupong LAB-OK  kon  LUNSAY NGA AMBAHAN SA MGA BISAYA SA FACEBOOK)