Kaban ni Atty. J. B. Jimenez: I.....K.....A.....W..........N.....A.....!!!!!!

Ikaw Ang Kahayag Nga Naga Iwag Sa Mangiob,

Nga Kinabuhing Daw Gibilanggo Sa Langob,

Ikaw Ang Nag Inusarang Isog Nga Tingog,

Nga Mihagit Sa Gahom Nga Walay Makabuntog,

Ikaw Ang Alintabo Sa Kainit Nga Nag Dala Sa Kadasig,

Nga Nakabaton Ug Kaisog Nga Mosukol Sa Manlulupig,

Ikaw Ang Tinta Sa Pluma Nga Hapit Nang Maughan,

Hapit Nang Sa Mga Pulong Ug Titik Mahutdan.

Ikaw Ang Suwab Sa Pinuti Nga Maoy Motigbas,

Sa Mga Garbosong Gabok Nga Buot Ma Lubas.

Ikaw Ang Nahabiling Kaikag Niining Sinalikway,

Nga Nagkagidlay Sa Tanang Panaugdaog, Pagsuway,

Ikaw ang Katapusang Hunat Niining Akong Panaw,

Bugtaw Sa Mga Pangindahay Nga Hapit Nang Mahanaw,

Ikaw ang Nahabiling Umoy Sa Akong Luya Nga Lawas,

Nga Gihasi Ug Gigukod Sa Mga Mangtas Ug Aliwas,

Ikaw ang Usa Ka Huni Taliwala Sa Mingaw Nga Kagabhion,

Nga Naka Pukaw  Sa Gidukang Pakigbisog Intawon,

Ikaw Na Lang Ang Nahabiling Bugtong Kong Paglaom,

Nga Ning Pagduhiraw Daw Trabongko Nga Gi-om om...

(Bug-os ang pasalamat sa  KAHAYAG  ngadto sa nagsulat sa  garay    nga si  ATTY. JOSEPHUS B. JIMENEZ.   Usa siya ka kanhi Department of Labor and Employment  (DOLE)  Undersecretary, kanhi Vice President, PEPSI COLA PHILIPPINES, kanhi Director for Labor Relations, SAN MIGUEL CORP., kanhi Personnel Director, PETRON ug PNOC, magtutudlo sa kurso sa abogasya sa mga dagkong tunghaan sa Manila sama sa UST, FEU, UE, SAN SEBASTIAN,  kanhi Labor Attache ngadto sa mga nasod sa Malaysia, Kuwait ug Taiwan,  magsusulat sa nagkadaiyang libro sa mga nagtuon sa kurso pagka abogado. Nagikan siya  sa pamilya nga taga Ronda, Dumanjug ug Argao sa lalawigan sa Sugbo. Malamposon kaayo siya sa pagkab-ot sa iyang damgo ug tinguha, ug karon magtampohan sa peryodikong The Freeman isip magsusulat ug artikulo matag semana. Siya ang tigtukod sa grupo sa mga magsusulat nga magtatampo sa grupong LAB-OK  kon  LUNSAY NGA AMBAHAN SA MGA BISAYA SA FACEBOOK)