Kaban ni Teofy del Mar: MGA GANGHAAN

Mobukas-motak-op, ang mga palid sa ganghaan;

Diin ikaw, ako, sila... kitang tanan: mosulod-mogula.

Sa pagkahimugso sa usa ka bata -

May ganghaan sa kahayag nga mabuksan.

Sa langit mobusilak ang iyang kaluhang bituon

Nga nagsapnay sa mga tigmo ug tanghaga -

Nga gitagoan sa iyang mga ugma.

Sa pagkahimugso sa Mesiyas -

May kometa nga misangkad sa kapunawpunawan

Nagsangyaw sa pagkanaog sa Paraiso dinhi sa yuta.

Samtang ang dagat magpadayon pa sa paghunas ug pagtaob -

Ingon nga ang ting-ulan ug tingpamulak moabot ug moagi...

Ang panaw sa kinabuhi usab magpadayon.

Magpadayon ug magpadayon..!

Daghan pa ang mga ganghaan nga atong mabuksan.

May mga ganghaan nga tugob sa himaya...

Apan may magdulot usab sa mga kasakit.

Ingon nga may kadaogan ug may kapakyasan..!

Apan dunay usa ka ganghaan nga dili nato mabuksan;

Samtang may landong pa sa pagduhaduha

Nga mohasol sa atong pagtuo...

Kay ang yawe niini dili makita... dili mahikap.

Anaa kini sa kalunsay ug kaputli sa kasingkasing;

Ug mabuksan niining maong yawe -

Bisan ang ganghaan nga bulawan sa bag-ong Jerusalem.

Nabatyagan mo na ba ang yawe diha sa sulod sa imong dughan?

Kon ugaling wala pa, suwaye kuno paglingi ang imong agi...

Sutaa pag-ayo kon may mga sayop ug pagkulang ka pa ba

Niining panaw mo sa kinabuhi; basin kasubhan pa

Sa mahinulsolong mga luha, ang nagbaga mong mga tunob..!

Ug dinhi, mabuksan mo na ang kataposang ganghaan...

Ang ganghaan sa tunhay nga himaya!!!

(Bug-os ang pasalamat sa  KAHAYAG  ngadto sa nagpaambit ning garay   nga si  TEOFY DEL MAR. Usa siya ka tadhan nga magbabalak nga nabantog dili  lamang sa Sugbo kon dili sa ubang bahin usab sa atong nasod. Natudlo siya isip pangulo sa inilang hugpong sa mga  magsusulat ginamit ang pinulongang binisaya, "LUDABI", Lubas sa Dagang Binisaya nga natukod kaniadtong 1956 sa mga magsusulat, magsisibya, ug mag-aawit nga Bisaya sa Dakbayan sa Sugbo kansang panlantaw ug  tinguha mao ang pagpalambo sa pinulongang Binisayang  Sinugboanon ingon man sa  arte ug kulturang Binisaya. Daghang bangga sa panulat ug balak ang malamposon niyang nalambigitan. Ang iyang  kainila sa natad sa balak ug pagkamagsusulat ginamit ang pinulongang binisaya nakakulit na sa iyang pangalan sa hawanan sa mga bantogan.)