KAPITOLYO, BUHATAN? BILANGGOAN?

Nagkadaiya ang panahom nga miturok sa hunahuna sa katawhan  sa padayong kasikas sa Kapitolyo.  Mihugpa sa kadalanan sa Kapitolyo ug lainlaing bahin sa dakbayan sa Sugbo kagahapon, Enero 9, 2013, ang katawhan nga nagikan pa  sa lagyong kalungsuran sa probinsiya sa Sugbo sa tuyo ug tumong nga makapundok, makapunsisok ug  makapakita sa ilang gidaghanon ug hiniusang suporta.

Gibuksan kini ug santos nga misa,  gitak-opan ug tingog daw pangampanya. Sayod kitang tanan nga ang gihisgotan, ang uyok niining tanang kasikas nga atong nasaksihan, nagikan sa usa ka hukom nga naglatid sa mga basehanan aron makatuyok ang ligid sa hustisya alang sa magsusumbong ug sa sinumbong.

Ang sistema sa atong gobyerno  nagmando ug mga pamaagi nga angayang sundon ug tahuron kon kini maabot na sa  punto nga ipaubos na ang paghukom. Mao kini ang tahas sa usa ka nasod nga mikalawat sa mithi ug prinsipyo sa demokrasya. Yano ra kaayo ang buluhaton, tahuron ang balaod, tahuron ang mando ug sugo sa hukom. Ug kon ikaw wala makauyon niini, adunay pamaagi ubos sa balaod ang gilatid nga sarang matamdan ug kapasikaran.

Apan, dakong sayop ang pagpaanod sa bul-og sa panghunahuna'ng  magmugna lamang ug kagubot ilabi na kon ikaw magpasabot nga dili ug dili gayud motuman sa mando sa balaod kay lagi mipilit sa imong alimpatakan ang pagpaugat, ang pagtuo nga ikaw maoy gitagan-an sa lingkoranan,  nga gibakwi na karon sa balaod alang sa mas haom ug angayan’g modala sa tingog sa katawhan.

Mao kini ang tahas sa pangagamhanan, kon makamao ka mosulod, makamao ka usab mogawas. Kon magpabilin ka sa sulod, kini magpasabot, dili na buhatan ang imong gisudlan, kon dili  bilanggoan.