Kaban ni Atty. J. B. Jimenez: KON MOSAYAW ANG MGA ELEPANTE, KINAHANGLANG MOPAKPAK ANG MGA MANOK. . . . . .

i

Kay sa bugno' sa mga aliwas, Daghang mga di Makalingkawas,

Padaplin ang mga mayokmok aron di madugmok ug ma-impas,

Kon mosayaw ang mga Harianon, mga palakpak kinahanglanon,

Gikan Sa Mga timawang mga meron ug mga way nahut nga ulipon,

Kon mo salida ang mga halangdon bisag napulak na sa ilang trono,

Gikinahanglan Baya Nga Mo palakpak

Ang Mga Ulog Ulogan Nga Pilipino.

ii

Sa Bugno' Sa Mga Gamhanang Nasyon,

Moyukbo Ang Mga Mayukmok Intawon,

Ang Atong Yutang Tabonon Gipanamastasan,

Sa Mangtas Nga Kano Ug Mga Tang-ang Kanahan,

Magpailob Kita Kay Mga Way Isog, Way Katakos,

Ang Mga Kabus, Naanad Sa Pag paubos.

iii

Bisag Hadlokon Pa Kita Sa Mangtas Nga Tsina,

Ug Ang Teritoryo Ilang Agawon Sa Kahakog Ug Kasina,

Kitang Mga Gagmayng Walay Mahimo Kon Dili Moduko'

Mangalugpoy Nga Bahag Ang Ikog Nga Nanagpungko'

Kay Kon Mosayaw Na Gani Ang Mga Elepanteng Mangtas,

Padaplin Ang Mga Talawang Manok Aron Dili Matodas.

(Bug-os ang pasalamat sa  KAHAYAG  ngadto sa nagsulat sa  garay    nga si  ATTY. JOSEPHUS B. JIMENEZ.   Usa siya ka kanhi Department of Labor and Employment  (DOLE)  Undersecretary, kanhi Vice President, PEPSI COLA PHILIPPINES, kanhi Director for Labor Relations, SAN MIGUEL CORP., kanhi Personnel Director, PETRON ug PNOC, magtutudlo sa kurso sa abogasya sa mga dagkong tunghaan sa Manila sama sa UST, FEU, UE, SAN SEBASTIAN,  kanhi Labor Attache ngadto sa mga nasod sa Malaysia, Kuwait ug Taiwan,  magsusulat sa nagkadaiyang libro sa mga nagtuon sa kurso pagka abogado. Nagikan siya  sa pamilya nga taga Ronda, Dumanjug ug Argao sa lalawigan sa Sugbo. Malamposon kaayo siya sa pagkab-ot sa iyang damgo ug tinguha, ug karon magtampohan sa peryodikong The Freeman isip magsusulat ug artikulo matag semana. Siya ang tigtukod sa grupo sa mga magsusulat nga magtatampo sa grupong LAB-OK  kon  LUNSAY NGA AMBAHAN SA MGA BISAYA SA FACEBOOK)