MAPASIGARBOHON SI DODONG BISAYA

May moingon ang binisaya gahi. Ang magbinisaya isug paminawon, mulahutay kon tugawon, dili muatras kon hagiton, moyangoyango kon paalagaron, mais ang paboritong kan-onon, dili mosibog bahala’g magkadusingot ug  bisan  pa’g asa mangabot. Gikan sa inibtanay’g bungot hangtod sa bangga sa ugatong paningkamot, kini dili magpaparot. Dili  sama sa ubang pinulongan, sama sa inamerkano’ng lumoy pamation, dali ra kaayo’ng puklingon  kon pagahiay na ang paminawon. Dali’ng modukoduko mura’g manggiulawon, humok pa kuno’s mamon. Sa pinulongang binisaya, kini buntogon.  Daghang hiyas ug pagdibuho  kon pinulongang binisaya ang gamiton, ang laya lunhawon. Sa pinulongang binisaya ikaw lamaton.

Si Inday  Pilita,  misinggit may gikalisangan. Si Dodong Bisaya, nagdali, miduol  aron makatabang

Nagtinagalog  si Inday nga misumbong,  ang  iyang paa kuno napaakan. “Saklolo,  kinagat ng kuting ang aking paa.” Pagkaabtik ni Dodong Bisaya, mipadagan dayon sa iyang kamot gamhanan aron makuhaan, mapaphaan ug mahikapan ang paa’ng  napaakan.

“Bastos? mas maayo pay nagbinisaya ko. Dili   paa nga binisaya ang akong gipasabot nga maoy napaakan,  kon dili kining  akong tiil.  Nagtuo man gud ko’ng tagalog ka. Dia man gud ta sa Manila eh?

“Ah, mao ba diay Day. Sori, tataw man gud nako’ng mabati ug makita ang timailhan, ang dili matuis nga kamatuoran. Ang imong panglitok, ang tanan nagpasabot nga susama kita ug gigikanan. Ang  dugo’ng bisaya sa atong kaugatan dili nato malimdan.” mapasigarbohon si Dodong Bisaya nga namulong.

“Butangi!!!” nauknol si Inday Pilita, pero sa dihang nakatutok na siya ni Dodong Bisaya naaninag niya ang pamayhon ug kaambongan niini. Tigson ang panglawas, itomon,  tinuod nga simbolo sa  kaliwat ni Lapulapu. Nanglumoy si Inday Pilita. Mihangad, takna na sa iyang abyon nga pagasakyan padulong sa Sugbo.

Ug sa dihang kuhaon na unta  niya ang bagahe sa iyang kiliran, may laing kamot nga mikawhat niini, maoy mibitbit.

“Tugoti nga ako’y modala sa imong bagahe Day, susama man ta ug padulngan. Ako diay si Dodong Bisaya, imong kasaligan, kanunay’ng moalagad ug  andam nimong  kasandigan.”

“Ako pud diay si Pilita.” mapahiyomon si Inday Pilita.

“Unsa Day nagpilit na?” sukna ni Dodong Bisaya nga daw nabungol sa kaanyag sa gikailaila.

Daw natunaw si Inday Pilita sa nabati  ug nakita. Andam na siyang mosandig sa kabaskog ni Dodong Bisaya. (KATAPUSAN).