MANGGIHUNAHUNAON SI DODONG JUAN

Nahapnan si Dodong Juan sa pagpauli usa ka adlaw niana.

“Pastilan baya ka Dong Juan,  nagkamuritsing ka man lang. Sus, gibilin ka baya namo ni Lola Ason nimo sa imong mga ginikanan. Dili ka kuno namo pasagdan.” nahasinta si Noy Tino  pagkakita niya sa iyang apo.

Nag-inusarang apo nga mipuyo  si Dodong Juan sa panimalay uban sa magtiayong Noy Tino ug Nang Ason. Tigpadad-anan lang ug kuwarta ang mga ginikanan ni Dodong Juan nga namatigayon sa Manila.

“Pasagdi lang gud Lo Tino,  aduna man pud bitaw koy gidala’ng sinugatan para nimo. Espesyal ni. Hala dawata hinuon ni palihug.”dayong tunol sa gidala nga gisulod ug  gamay’ng bulsita.

“Oy, unsa man ni?” dala kahingangha.

“Sus nalimot ka nga adlaw man nimo karon? ”

“Hala, mao ni imong gidala?”

“He, he, nahibalo ko Lo Tino, kinaham na nimo.”

“Pagkapilyo gyud nimong apoha ka. Sinati ka kaayo sa akong kinaham. Pagkabuotan baya gyud nimo Dong Juan. ” mibathay sa panagway ni Noy Tino ang kalipay.

“Ikaw na gud na Lo Tino.” mapasigarbohong pamulong ni Dodong Juan.

“Hoy,  naunsa gud mong duruha nga kadagko ba ninyo’g tingog. Hala Tino pagkurikuri na sa kusina. Tabangi hinuon ko pag hiwahiwa sa atong lutuonon aron makapanihapon na ta.”

Ug ikaw Dong Juan hala pag-ilis na didto oy. Nanimaho ka man lang adlaw. Layo ra ba to inyong lakaw sa gitambongan nimong  ekskursiyon.

“La Ason, maayo kay naabot na ka. Gidad-an pud tika ug sinugatan. He, he, hala dawata hinuon ni La Ason.” dayong tunol ni Dong Juan  sa apohan sa iyang gidala.

“Sus kabuotan gyud ning akong apo, abi ko man gud ug si Lolo Tino ra nimo ang imong pinangga.”

“Oy, unsa man ni kagamay gud.”

“He, he, imo nang mauyonan La Ason.”

“Sige Lo Tino ug La Ason, mosulod sa ko sa akong lawak. Mag-ilis ko.”

“Ason, maayo kay milakaw na si Dong Juan, dali magsaulog na ta sa akong bertday. He, he, he.”

“Ikaw gyud Tino wala ka gyud mausab. Hala sige gud magsugod na ta.

“Sus pagkabugdo, bantok, sakto kaayo sa gidak-on. Ug klaro  kaayo ang liki. Unya init-init pa. Sakto kaayong ilampurnas. ”

“Bitaw, nasayod ko. Pero yuna pa, kuyos na man intawon ning akong gikuptan  oy.  Kupos.  Magulang na lang ug diyotay sa sigarilyo. Gadako na lang ang putos, medyo lagom-lagom na pud.”

“Hinaya imong tingog, basin ug madunggan ta ni Dong Juan.”

Nangandam na si Noy Tino ug Nang Ason sa dihang, sa kalit lang.

“Hoy Lo Tino ug La Ason, dia ra man gud diay mo dinhi sa inyong lawak.”

“Ah Dong Juan, gipakalitan man me nimo. ” halos magkadungan ug pamulong si Noy Tino ug Nang Ason.

“He, he, naunsa ba mo oy nga patagotago pa man mo. Dali  na. Mangaon na ta nianang gidala nakong bingkang pinaliki nga kinaham nimo Lo Tino, init-init pa ra ba na. Dad-on ko na lang pud sa talad kan-anan La Ason kanang budbod kabug  sa Sogod,  pasensya na. Kuyos ug kupos na intawon ning budbod nga imong gikuptan.  Mahal na man kuno  kaayo ang kinilo.” (KATAPUSAN).