Kaban ni Atty. J. B. Jimenez: DIOS KO, DIOS KO, NGANONG GISALIKWAY MO AKO

DIOS KO, DIOS KO, NGANONG GISALIKWAY MO AKO

Dios Ko, Dios Ko, Nganong Imong Gipasagdan,

Nga Ang Mga Politiko Ang moguba' Ning Yutawhan,

Nganong  Gitugotang Mag-abuso ang Mga Magpapatigayon,

Ang Mga Timawa' Gihimo Nilang Mga Busabos Ug Ulipon?

Nganong Imong Gisalikway Ang Mga Kabus ?

Nga Naghulat Sa Usa Ka Maloloy-ong Manunubos?'

Nganong ang Mga Obrero Halos Dili Na Makakaon,

Kay Ang Suweldo Hapit Nalang Nga Pangayoon,

Bisan Sa Kalisod Sa Ilang Mga Buhat,

Walay Mahimo Bisan Unsa Ka Bug-at?

Nganong Imong Gipasagdahan Ang Mga saop,

Nga Giilogan sa Yuta' Sa Mga Gamhanang Mananakop?

Nganong Imong Gitugotan Nga Gub-on,

Ang Mga Kalasangan Ug Mga Bukid Nga Kinaiyanhon,

Sa Mga Hakog Nga Mga Loggers Ug Mga Minero,

Nga Way Gugma Sa Nasod Ug Sa Isigka Tawo,

Nganong Imong Gitugotang  Hugawhugawan,

Ang Mga Tubod, Sapa' Ug Kadagatan ?

Nganong Gitugotan Mo Ang Kalamidad ?

Nga Mopatay Sa Libo Libong Katawhan Nga Nangalit-ad?

Nganong Gitugotan Mo Ang Sakit Nga Mananakod ?

Nganong Ang Kalinaw Ug Kalipay Dili Mohangtod ?

Nganong Mohilak Ug Mobakho ang Imong Mga Linalang?

Nganong Gimugna Mo Ang Kasakit Ug Salimuang?

Nganong Gitanom Mo Ako Sa Imong  Paraiso?

Ug Sama lamang Sa Gibalibag Nga Liso?

Nganong Wala Molipang Ang Gugma Ko Ug Balatian?

Ngano Nga Nahimo Akong Bato Ning Kalibotan?

Nganong Gisalikway Mo Ako Nga Imong Anak?

Nganong Sa Pagduhiraw Ko Wala Ka Aron Mo-agak?

Nganong Imong Gimugna Ang Kaguol?

Nganong Imong Gitugotan Ang Pagbasol?

Nganong Gipasanay Mo Ang Mga Mabangis Ug Lampingasan ?

Nganong Ang Mga Salbahes Ug Way Tanlag Imong Gipadaghan?

Nganong Ang Mga Maayo Giulipon Sa Mga Dautan?

Nganong Dugay Kaayong Mosangko Sa Kadaugan?

Dios Ko, Nganong Gihimo Mo Akong Buta Sa Mga Katahum?

Nganong Gihimo Mo Akong Bungol Sa Nindot Mong Kahilum?

Nganong Gipaka Amang Mo Ako Sa Daghang Mga Tulobagon?

Ug Nganong Gipaka Bakol Sa Daghang Panaw Nga Lakatonon?

 Nganong Gihimo Mong Matig-a ang Gahi AKong KasingKasing?

Nganong Ang Binhi Mong Gugma Wala Gani Manalingsing?

(Bug-os ang pasalamat sa  KAHAYAG  ngadto sa nagsulat sa  garay    nga si  ATTY. JOSEPHUS B. JIMENEZ.   Usa siya ka kanhi Department of Labor and Employment  (DOLE)  Undersecretary, kanhi Vice President, PEPSI COLA PHILIPPINES, kanhi Director for Labor Relations, SAN MIGUEL CORP., kanhi Personnel Director, PETRON ug PNOC, magtutudlo sa kurso sa abogasya sa mga dagkong tunghaan sa Manila sama sa UST, FEU, UE, SAN SEBASTIAN,  kanhi Labor Attache ngadto sa mga nasod sa Malaysia, Kuwait ug Taiwan,  magsusulat sa nagkadaiyang libro sa mga nagtuon sa kurso pagka abogado. Nagikan siya  sa pamilya nga taga Ronda, Dumanjug ug Argao sa lalawigan sa Sugbo. Malamposon kaayo siya sa pagkab-ot sa iyang damgo ug tinguha, ug karon magtampohan sa peryodikong The Freeman isip magsusulat ug artikulo matag semana. Siya ang tigtukod sa grupo sa mga magsusulat nga magtatampo sa grupong LAB-OK  kon  LUNSAY NGA AMBAHAN SA MGA BISAYA SA FACEBOOK)