Kaban ni Atty. J. B. Jimenez: MAY NAHIKALIMTAN KA BA ?

i

Nakalimtan mo bang mo-duaw,

Sa Mga Ginikanang Gimingaw,

Nataligam-an Mo Ba Ang Kahidlaw,

Nila Kanimo Gabii O Adlaw.

ii

Nakalimtan  Mo Bang Mangayo'g Pasaylo,

Sa Mga Nahiubos  Nga Mga Tawo,

Morag Kintahay  Di Ka Na Mahibalo

Nga Motimbaya Sa Kaniadto  Imong Kasawo,

iii

Hilabihan Ka Na Ba Ka Halangdon,

Nga Dili Na Makab-ot  Sa  Isigka-Ingon,

Nahikalimot  Ka Ba  Kon Asa  Paingon,

Ug  Kon Unsa  Ka  Kagahapon?

iv

Nahikalimot Ka Ba Kon Diin Ka Gikan,

Kon Asang Suok Sa Kalibotan,

Nakalimot Ka Ba Sa Kahulogan

Sa Kinabuhi Natong Tanan?

v

Nganong Wala Kay Pagpaka bana',

Nagpatuyang Sa Imong Hunahuna',

Nahikalimtan Mo Ba Ang Tukma'

Nga Tumong Sa Matag Takna?

(Bug-os ang pasalamat sa  KAHAYAG  ngadto sa nagsulat sa  garay    nga si  ATTY. JOSEPHUS B. JIMENEZ.   Usa siya ka kanhi Department of Labor and Employment  (DOLE)  Undersecretary, kanhi Vice President, PEPSI COLA PHILIPPINES, kanhi Director for Labor Relations, SAN MIGUEL CORP., kanhi Personnel Director, PETRON ug PNOC, magtutudlo sa kurso sa abogasya sa mga dagkong tunghaan sa Manila sama sa UST, FEU, UE, SAN SEBASTIAN,  kanhi Labor Attache ngadto sa mga nasod sa Malaysia, Kuwait ug Taiwan,  magsusulat sa nagkadaiyang libro sa mga nagtuon sa kurso pagka abogado. Nagikan siya  sa pamilya nga taga Ronda, Dumanjug ug Argao sa lalawigan sa Sugbo. Malamposon kaayo siya sa pagkab-ot sa iyang damgo ug tinguha, ug karon magtampohan sa peryodikong The Freeman isip magsusulat ug artikulo matag semana. Siya ang tigtukod sa grupo sa mga magsusulat nga magtatampo sa grupong LAB-OK  kon  LUNSAY NGA AMBAHAN SA MGA BISAYA SA FACEBOOK)