SEMANA SANTA

Paghinumdom sa pagpasakit ug pagkabanhaw

Semana'ng ang pagkamapasayloon giuhaw,

Tininuod nga penitensiya ug indulhensiya,

Mga dagkong hagit kini sa konsiyensa,

Niining panahon sa kahaw-ang ug puasa,

Pagutom ug dili pagpatuyang dasigon ta,

Pagpanglupig, pagkamasalaypon iwahing ta,

Paghinulsol, sa kamakanunayon ipatigbabaw ta,

Mga sugo kini nga tugob sa kabalaanon,

Yukbo sa pagtuo sa lunsay’ng Kristohanon,

Isilsil sa alimpatakan, hinuktokan, hinumdoman,

Tanang buhat sa kadautan may kinutuban,

Mga nanimpalad, mga hulagway’ng nangluspad

Bulsa’ng walay sulod bisa’g unsaon pa’g balit-ad,

Kanunay’ng nagukod sa kalipay’ng haruhay

Nag-ilaid sa pagkatawhanon ug mga pagsuway

Pangaliya sa kahitas-an himoon ta kining giya

Sa hunahuna, sa pulong, sa buhat, sa buhatonon pa,

Pagpalandong sa atong pagtuaw bugtawon ta,

PAGKAMATARONG, ang sugo sa Semana Santa!!!

KAHAYAG