Kaban ni Atty. J. B. Jimenez: UNSA'Y IMONG GI-DALIAN ?

i

Nganong Kanunay kang Nagadagan?

Unsa'y imong Gi-dalian?

Aduna ka ba'y buot Unahan,

O gigukod nga buot Agawan?

Nganong Wala' Ka'y Pag Dahan Dahan,

Sa Takna' Ug Gutlo' Nga Tanan ?

ii

Daghan Na Ang Imong Hitumban,

Maka-abot Ka Lamang Sa Buot Padulngan,

Ubay Ubay Na Ang Imong Nadat-ogan

Kay Buot Mong Ikaw Ang Kinatas-an,

Bisa'g Ang Dungog Paga Yatakan,

Makab-ot Mo Lang ang Na-ibgan ?

iii

Unsa Bay Tumong Nianang Tanan,

Nga Gibugti' Mo Sa Katarong Ug Sa Katarungan,

Palabihon Mo Ba Ang Bahandi Sa Kalibotan,

Kay Sa Mga Prinsipyo Ug Baroganan,

Nganong Ang Pag-angkon Sa Kabtangan,

Buot Mong Hakpon Bisag Gipanag-iya  Sa Uban?

iv

Imo Ba Diay Nga Hitaligam-an,

Ang Mga Bulawanong Pagtulon-an,

Ang Hinungdanong Sugo' Sa Amahan,

Imo Na Bang Gisalikway Ang Mga Sumbanan,

Nga Maoy Molungtad Kay Lagi Balaan,

Dili Ikabaylo Sa Bulawan.

v

Nganong Imong  Gibudhi-an Ang Kaigsuonan,

May Gibugtaw Ba Kamong Katumanan,

Asa Ba Padulong Ang Imong Paingnan,

Ang Tiunay Nga Tumong Ug Kahulogan,

Imo Na Bang Nakiita ug Hikaplagan,

Ang Lunsay Nga Kalipayng Tinaguan?

(Bug-os ang pasalamat sa  KAHAYAG  ngadto sa nagsulat sa  garay    nga si  ATTY. JOSEPHUS B. JIMENEZ.   Usa siya ka kanhi Department of Labor and Employment  (DOLE)  Undersecretary, kanhi Vice President, PEPSI COLA PHILIPPINES, kanhi Director for Labor Relations, SAN MIGUEL CORP., kanhi Personnel Director, PETRON ug PNOC, magtutudlo sa kurso sa abogasya sa mga dagkong tunghaan sa Manila sama sa UST, FEU, UE, SAN SEBASTIAN,  kanhi Labor Attache ngadto sa mga nasod sa Malaysia, Kuwait ug Taiwan,  magsusulat sa nagkadaiyang libro sa mga nagtuon sa kurso pagka abogado. Nagikan siya  sa pamilya nga taga Ronda, Dumanjug ug Argao sa lalawigan sa Sugbo. Malamposon kaayo siya sa pagkab-ot sa iyang damgo ug tinguha, ug karon magtampohan sa peryodikong The Freeman isip magsusulat ug artikulo matag semana. Siya ang tigtukod sa grupo sa mga magsusulat nga magtatampo sa grupong LAB-OK  kon  LUNSAY NGA AMBAHAN SA MGA BISAYA SA FACEBOOK)