Kaban ni Atty. J. B. Jimenez: KINSA'Y ANGAYANG ILANSANG SA KRUS..... ???

i

Inay si Jesus, nga walay Kasal-anan,

Aniay Daghang Mga Banggiitan,

Mga Politikong Kadaghanan Limbongan,

Mga Way Kasing Kasing Nga Adunahan,

Mga Way Puangod Nga Gamhanan,

ii

Mga Mapahitas-on Tungod Sa Kinaadman,

Mga Laug Sa Bahandi Ug Kabtangan,

Mga Kurakot Sa Kagamhanan,

Mga Way Pagpakabana' Sa Pag-antus Sa Uban,

iii

Mga Nagpaka-aron Ingnon Nga Pariseo Sa Simbahan,

Mga Way Tahud Nga Kabataan,

Ug Mga Irresponsableng Ginikanan,

Mga Magtutudlo Nga Way Gitudlong Kamatuoran,

iv

Mga Polis Nga Mangilkil Sa Mga Katawhan,

Mga Sundalong Abusado Sa Katungdanan,

Mga Abogadong Babag Sa Katarungan,

Mga Doktor Nga Kuwarta Ra'y Gikinahanglan.

v

Mga Datu Nga Way Paghigugma Sa Kalikupan,

Maoy  Mipuril Sa Atong Kalasangan,

Maoy Milawgaw Sa Mga Sapa' Ug Kadagatan,

Maka Kwarta Lang Way Respeto Sa Kinaiyahan.

vi

Mga Negosyanteng Daghang Gi Bintahaan,

Mga Empleyadong Linimbong ang Suholan,

Walay Mga Benepisyo Mga Ulipon Kasagaran,

Samtang Nagpadagko Sa Ilang Tiyan.

vii

Mga Banyaga Nga Tag Ia Ug Mga Eskuylahan,

Sa Gitas-on Sa Mga Tuwisyon Nga Bayranan,

Nanag Hikog Na Lamang Ang Mga Tinun-an,

Ug Nag Dangoynguy Ang Mga Ginikanan.

viii

Pagkadaghan'g Drug Lord, Ug Gambling Lord Nga Kanahan,

Naghari Ang Mga Kidnappers, Carnappers, Sa Katilingban,

Apan ang Labing Mangtas Nga Kawatan Sa Tanan

Maoy Angay Nga Ilansang Kanang Mga Kawatan Sa Kagamhanan.

(Bug-os ang pasalamat sa  KAHAYAG  ngadto sa nagsulat sa  garay    nga si  ATTY. JOSEPHUS B. JIMENEZ.   Usa siya ka kanhi Department of Labor and Employment  (DOLE)  Undersecretary, kanhi Vice President, PEPSI COLA PHILIPPINES, kanhi Director for Labor Relations, SAN MIGUEL CORP., kanhi Personnel Director, PETRON ug PNOC, magtutudlo sa kurso sa abogasya sa mga dagkong tunghaan sa Manila sama sa UST, FEU, UE, SAN SEBASTIAN,  kanhi Labor Attache ngadto sa mga nasod sa Malaysia, Kuwait ug Taiwan,  magsusulat sa nagkadaiyang libro sa mga nagtuon sa kurso pagka abogado. Nagikan siya  sa pamilya nga taga Ronda, Dumanjug ug Argao sa lalawigan sa Sugbo. Malamposon kaayo siya sa pagkab-ot sa iyang damgo ug tinguha, ug karon magtampohan sa peryodikong The Freeman isip magsusulat ug artikulo matag semana. Siya ang tigtukod sa grupo sa mga magsusulat nga magtatampo sa grupong LAB-OK  kon  LUNSAY NGA AMBAHAN SA MGA BISAYA SA FACEBOOK)