SINGOT

SINGOT

Bunga’ng namugna sa paugnat ug kusog,

Sa singot makita nato ang panlimbasog,

Kuyog  kini sa hangos, may kahigwaos

Modagayday, mopadailos,  ug mag-agos,

Sa managhigugmaay'ng nanagtakos,

Gitugkad ang kainit sa hugot nga gakos,

Ipabuhagay ang gugma'ng gauros-uros,

Sa subrang pasingot may makapanguros.

Taliwala sa nagtabisay’ng singot

Nagpangapkap ka ug pulong palusot.

"Husto na Day, Semana Santa na, panahon na karon sa puasa.' ni Noy Oka Bilyako nga gipaningot.

“Unsay husto na, wala pa gani ko makasugod.” ni Magda pa nga natumog usab sa singot samtang nag-ukay sa mga linuto aron ikatumod sa kamerkadohan. Dili siya makahunong sa inadlawong gimbuhaton, kay kini mao man ang gisaligan sa ilang pagkaon.