SI PITO POLITIKO

SI PITO POLITIKO

Sa kadaghanan siya nahimong inila, kusog magpailaila ug mangumusta, ngisihan bisan kinsa, bisan dili kaila. Ang piniliay maoy iyang puntarya. Kuhaon ang boto de kumpiyansa, sa kadaghanan, puntil sa kuwarta. Pinalitay maoy iyang hiramenta. Human sa  bugnong lugaynon,  human sa gasto’ng makalipong, siya maghinuktok ug maghunahuna. Gahom ug kahalangdon iya nang nakuha. Sa hilom ug samtang siya magpitokpitok, panudlanan sa katawhan siya makatutok. Takna sa pinalitay, milabay na. Ang pagbawi sa gasto’ng hinutdanay MIABOT NA!!!

Nanimpalad si Pito ug usa siya sa mga kandidato nga miitsa sa iyang kalo sa nataran sa politika pagka Mayor sa lungsod sa Hinikalimtan.

Daghan na ang  bugnong lugaynon nga  iyang gisalmotan, apan wala pa siya uyoni sa maayong kapalaran. Usa ka buntag niana.

“Ay, salamat  Mayor Pito, ania ka ra man diay dinhi.” pulong ni Noy Intoy.  Mahinangpon kaayo siya’ng nakakita ni Pito.

“Oy, ikaw man diay kini Noy Intoy,  nagkadusingot man ka?” sukna ni Pito. 

“Maayo kay naabtan gyud tika karong buntaga Mayor Pito,  layo baya kaayo ang akong gibaktas aron lang makaabot ug makakita ko nimo. Unsaon wala may musukol nga mga sakyanan nga mobiyahe hangtod dinhi sa inyong gipuy-an. Lawom kaayo ang mga libaong.” sagol hangos ang mga pulong ni Noy Intoy.

“Yuna pa, sa dili ka pa makasulti kanako sa imong katuyoan hala palihug kaon sa hinuon ug pamahaw. Maayo kay sayo ko nakapaluto ug kan-onon alang sa akong mga dumadapig nga sayo kaayong makahinundom sa pagsuroy.  Magda, palihug pakan-a si Noy Intoy ug tinughong diha. Paresi lang ug kamay.” Imbita ni Pito ngadto ni Noy Intoy.

“Ikaw gyud Mayor Pito ang akong iboto mao nga pasagdi lang ko nga mosangpit nimo ug Mayor. Angayan ka kaayo. Bisan tuod ug wala ka pa makadaug ug piniliay, apan tataw nakong makita ang imong pagka-angayan. Gawas nga dako ka ug tiyan,  imong tingog tibuok murag anad ka ug awit sa mga karaokehan. Pagkamaayo pa gyud nimo mohikyad ra ba sa mga hisgotanan nga makabusog sa panghunahuna namong mga katawhan.”

“Ay sus, ayaw paghisgot ug politika. Layo pa kaayo na. Wala pa gani magsugod ang opisyal nga pangampanya. Moagi pa ta ug semana santa. ”

Wala madugay, human nakalampurnas sa pamahaw nga gidalit ni Pito ug samtang basa pa gani kaayo ang iyang simod sa paghinigop sa sabaw sa tinughong nga giparesan ug kape’ng hinimo gikan sa sinangag nga mais, si Noy Intoy mipaturatoy ug litok sa gustong ipaabot ngadto ni Pito.  

“Mayor Pito, nabusog na ko. Pero, mura man ug haw-ang pa.” pulong ni Noy Intoy nga nagpasiplat sa binalit-ad niyang bulsa sa iyang gisul-ob nga karsones.

“He, he, ikaw gyud Noy Intoy wala ka gayud mausab. Nakasabot kaayo ko. Bisan tuod ug nangapo na ka. Apan ang imong pagkaabtik mamarayeg dili gayud hitupngan. Palihug lang ug sulod didto sa kamalig tuay sobre akong giandam.”

“Salamat kaayo Mayor Pito. Ikaw gayud ang pinakamasinabtanon sa tanan'g kandidato. Sinati kaayo ko nimo, sayon kang duolon apan lisod pangitaon.” pulong  ni Noy Intoy.

"He, he, ikaw gyud Noy Intoy, pagkakomedyante baya gyud nimo." (Sumpayan pa).