PANGANGKON

Buhat nga mopadayag ug pag-angkon,

Mowarawara, mopasiatab ang mangangkon

Tingog nga magdahunog ang gamiton

Kon may mosukwahi sa nangangkon

Nagkadaiya ang paagi sa pagpangangkon,

Kon kadaugan, daghan ang mangangkon

Apan sa kaparotan wala gayu’y moangkon

Ang pagpangangkon sukwahi sa pag-uyon

Daghan ang mat-an, magdala ug kampilan,

Yuta dili gayud biyaan, papel nga giagup-opan

Ang gisaligan, bisa’g katarungan gilumotan

Dili mabangbang,  tingog inisog ipabati sa tanan

Bisan pa ug sa hugonghugong maputlan,

Ang tanan dili igsapayan, sa pugoso’ng pangangkon

Daghan ang maamong, bisan pa kon pamation

Gaan paminawon, apan dudoso ang kamatinud-anon

May maayo’ng hukmanan ang pahukmon

Kining tanan kahatagan ug lawom nga pagtuon

Sa makuti’ng pag-utingkay sa utingkayonon

Kab-oton ang kahusay ug kamakiangayon.