Kaban ni Bo Sungcad: GI BAGYO SI TIKYO

Hilabihang paspasa nga nakabugsay ni Tikyo sa iyang bigiw paingon sa dunggo-anan sa mga sakayan nga nahimutang sa daplin sa baybayon sa Barangay San Antonio, Lungsod sa Rumba. Ni undang siya sa pagpamasol dihang misugod pagbundak ang ulan ug pag huros sa hangin ning buntaga. Ang mapintas nga unos nakapaursa sa balod sa dagat nga maoy iyang gikagul-an nga makapatikyaob sa iyang bigiw.

Wala man gud masayod si Tikyo nga may moabot nga bagyo karong adlawa. Ang bagyo moigo sa kasadpang bahin sa probinsiya, diin nahisakop ang Lungsod sa Rumba. Mga alas 5:30 kaganinang buntag, gi sibya sa PAG-ASA diha sa mga estasyonan sa radyo nga signal no. 2 ang maong dapit sa probinsiya. Apan lagi kay migawas naman siya sa ilang balay mga alas 5:00 pa sa kadlawon, dala ang iyang mga kahimanan sa pagpamasol, si Tikyo wala na makabati pa sa maong balita.

Matag adlaw gud, gawas kon mahibaw-an daan ni Tikyo nga ngil-ad gyod ang panahon, dili siya mopalta sa pagpamasol didto sa kantiladong dapit sa dagat nga may gilay-ong 200 metros gikan sa lapyahan sa baybayon sa ilang barangay. Sa dili pa siya moadto, mohapit una siya'g panguykoy og ipaon sa may katunggan nga duol ra kaayo sa tugkaran sa ilang balay. Sagad niyang makuhang paon mao ang mga takla, ulang ug pasayan. Hingubit kaayo niini ang mga til-ugon nga isda sama sa balanak, bilason, kuliso, osos-os ug uban pa. Ang iyang mga pinaslang isda maoy isuroy ug ibaligya ni Resing sa mga suki nga mahiligon og mga isdang til-ugon.

Bugtong anak si Tikyo. Bata pa nga mitaliwan ang iyang amahan sa edad niini nga 40 anyos, tungod sa sakit nga ulcer. Ang iyang inahan usab namatay sa edad nga 42 anyos, tungod sa sakit nga leukemia. Kay lagi kabus ug mananagat man lang, bugtong kabilin sa amahan ni Tikyo mao lamang ang bigiw nga sakyan sa pagpamasol.

Tulo ka tuig ang milabay human namatay ang iyang inahan, naminyo si Tikyo ni Resing nga anak usab og mananagat nga molupyo sa kasikbit nga barangay. Malipayon sila bisan kabus, ug gitugahan sila'g usa ka anak nga babaye. Onse anyos na kini ug anaa na sa ikalimang ang-ang sa elementarya sa pampublikong tunghaan sa ilang lungsod. Buotan kaayo ang ilang anak ug maoy kaabag ni Resing sa mga buluhaton sa panimalay. Gi ampo kanunay ni Tikyo nga unta abunda ang iyang kuha sa pagpamasol matag adlaw aron dunay matigom sa halin niini nga ilang itagana ni Resing alang sa pagtungha sa ilang pinalanggang anak.

...Kalit nga nalamba ang sampot ni Tikyo. Kalit nga gitamparos ang iyang bigiw sa dako ug kusog kaayo nga balod. Gi duyan-duyan ug gi kuso-kuso kini'g maayo. Ang unos padayon pa gihapon sa pagpanghasi.

Duol na lang siya sa baybayon. Sa iyang bana-bana, mga 20 metros na lang siya gikan sa dunggo-anan. Gi maniobra niya ang bigiw pinaagi sa bugsay aron pag ilin-ilin sa balod. Apan ang balod daw sa nag huramentado. Gitamparos pag-usab ang iyang bigiw og natikya-ob gayod kini. Nalagpot si Tikyo...

Nahipugwat si Resing gikan sa iyang pagkatulog. Nabati niya ang lugapak sa salog kawayan nga gikan sa pantawan sa ilang balay. Dali siyang migawas sa kwarto aron susihon ang pantawan. Gi ablihan niya ang entradang pultahan sa ilang balay. Nakuratan siya sa iyang nakita.

"Hoy Tikyo! Na unsa ka gud intawon? Nganong natikay-ang ka man diha?" Sukna ni Resing nga wa magdahom sa nahitabo kang Tikyo. "Aw, Sing, Gi Bagyo ko!" Tubag ni Tikyo nga klaro kaayong gi alimungawan pa ug naglibog sa nahitabo kaniya. "Bagyo sa imong kagaral! Bangon diha oy, unsa wa ka pa mahuwasi nga alas 6:30 naman sa buntag?" Kasaba nga dalang pahinumdom ni Resing sa iyang bana.

Daw nakaamgo na si Tikyo. Nahinumdom na siya. Ala una na sa kadlawon siyang nauli sa balay kagabii gikang sa balay sa iyang silingang kumpare nga nagsaulog sa adlawng natawhan niini. Upat silang nagsalo sa pagtagay sa usa ka container nga tuba. nagsusapinday na siyang nauli. Tungod sa iyang kahubog, wa na siya makapamukaw pa ni Resing. Ug kay di naman makaabli sa entradang pultahan, diha na lang siya natulog sa bangko sa may pantawan sa ilang balay. Bag-ohay lang, wa na ma balanse ang iyang lawas sa gihigdaang bangko maong natikalbong kini ug nahagba siya sa salog kawayan sa ilang pantawan.

Nasayod na siya. Damgo ra diay kadtong bagyo nga miabot kaniya. (KATAPOSAN).