Kaban ni Mario: LAPYAHAN


Dili na nako mapaminaw
Ang kanaas sa balud sa lapyahan,
Apan ang imong hagawhaw
Sa kanunay kanako nagpukaw
Sa dili pa mosilak ang adlaw.
Dili na nako malantaw
Ang mga bulok sa bangaw,
Apan ang imo'ng pahiyom
Sa ako'ng mga tiil nagdumdum,
Bisan og lisud na sa paglakaw,
Dinhi sa lapyahan aron mahanduraw
Ang mga lusay sa ato'ng kagahapon
Nga nagpabili'ng lab-as ug nag-utaw-utaw
Sa lawud sa tumang kamingaw.

(Bug-os ang pasalamat sa KAHAYAG ngadto sa nagsulat sa garay nga si  Mario Vincenzo Menchavez Mandal, usa sa mga binuhat nga naghupot ug bulawanong pluma sa panulat sa pinulongang binisaya.  Nahimo kining garay isip halad sa nag-inusara  niyang amahan (Vitaliano Pedroza Mandal) ug sa gikamingawa'ng inahan (Nelsa Menchavez Mandal) nga nibiya sa kalibutan niadtong Marso 12, 2012).


Comments

Popular Posts